Om stiftinga
norsk countrytreff

Norsk Countrytreff er ei privat stifting med sete i Gloppen kommune. Stiftinga er etablert av Breimsbygda Idrettslag, Byrkjelo Ungdomslag, Breim Bygdeungdomslag, A/L Breimshallen, Breim Countryklubb, Stiftinga Norsk Fjordhestgard, Gloppen kommune og Sogn og Fjordane Fylkeskommune.

Styret:

Leiar: Nils R. Sandal
Nestleiar: Kent Øystein Hjelle
Styremedlem:  Bernt Reed
Styremedlem:  Per Jonny Moldestad
Styremedlem: Marie Carla K. Tveranger
Styremedlem: Turid Bøyum
Styremedlem:  Helge Råd

Administrasjon:

Dagleg leiar: Vegar Sårheim

OM FESTIVALEN NORSK COUNTRYTREFF

I 2024 vert Norsk Countrytreff (NCT) arrangert for 28.gong. I løpet av andre helga i juli vil 28 artistar og band stå på scena på fleire arenaer i heile kommunen. Hovudarenaen ligg på Norsk Fjordhestgard på Breim i Gloppen kommune.

Sidan første festivalen i 1995, har Norsk Countrytreff sakte men sikkert vakse seg til å bli eitt av dei største kulturarrangementa i Vestland, og det største arrangementet på Vestlandet innan sin sjanger. Frå 2000 besøkande første året, var det i 2023 ny publikumsrekord - med over 21 300 personar innom arrangementa som finn stad i heile Gloppen. 

NCT har ikkje som målsetting å bli den største festivalen, men å vere den beste. Kvalitet på alle plan er kjennemerket vårt. Vi prøver kvart år å vidareutvikle organisasjonen både for artistar, publikum og ikkje minst for alle dei nesten 800 funksjonærane som trår til desse dagane. Det har blitt ein tradisjon for glopparar og andre countryinteresserte å sette av denne helga til dugnadsarbeid, sosialt fellesskap og kulturelt påfyll. Det er ein tradisjon vi håpar vil halde fram i mange år. Og ved å ha ei kontinuerlig vidareutvikling trur vi dette er mogleg.

KONSERTAR

Onsdag kveld startar det på hovudarenaen for våre early birds, for å korte ned ventetida før det verkeleg brakar laus på torsdag. Fredag og laurdag er det 13 timar samanhengande livemusikk på festivalområdet. Først på dagen i Kolbeins Saloon, og ut på kvelden vert det musikk frå Hesjestauren òg.

Kyrkjekonserten i Breim kyrkje er vorte kalla flaggskipet til NCT.  Også i 2024 er konserten lagt til laurdag. Det er ei stor glede for artistane å delta på denne konserten, som kvart år fyller kyrkja til siste benk.

Den tradisjonelle og etter kvart svært populære Bluegrasskonserten i Frislidlada på Nordfjord Folkemuseum vert arrangert på søndag kl. 19.00. Det er ei spesiell stemning i dei rustikke omgjevnadane i denne gamle lada/låven, og bluegrassmusikken passar perfekt inn her.

I tillegg til dette er det konsertar på dagtid laurdag på Byrkjelo, Reed og Sandane sentrum. Dette skaper countrystemning i heile kommunen både for innbyggjarane og for tilreisande som er ute og handlar.

COUNTRY FOR ALLE

Barnas Countrytreff

I 2009 vart det for første gong arrangert eit eige tilbod for dei minste. Barnas Countrytreff set borna i fokus, og dei får oppleve både musikk, dans og aktivitetar. Også i 2024 vil vi tilby konsert til dei unge cowboyane. Arrangementet er gratis for alle.

Tilbod til dei eldre

Det har vore uråd for ein del eldre menneske å ta del i konsertane på dei ulike arenaene våre. Vi tok difor i 2009 med artistar ut frå arenaen til bufellesskapa i Hyen og Byrkjelo, samt på sjukeheimen på Sandane. Dette vart svært vellukka arrangement, med gode tilbakemeldingar. Arrangementa på bufellesskap og sjukeheim har vorte ein tradisjon sidan den gong. Med dette tilbodet, i tillegg til Barnas Countrytreff, er vi ein festival for alle aldersgrupper.